Chirurgia Rifrattiva cù u laser

U Laser EXCIMER, hè:

• A tecnica apradata : u modu PKR (Futtucheratittumia Rifrattiva)

  St’intarvinzioni parmetti a currizziò, in modu efficaci è sicuru, da quand’edd’hè stabilizata a vista (vali à dì versu l’ità di 20 anni), di parechji mendi di a vista : miupia, astigmatisimu, ipermitrupia è presbizia.

  A spera laser travaglia cù culpetti lebbii lebbii è cuntinui di 0,25 micro da turrà à strutturà una di i mani in superficia di a curnea. Scalpiddinendu a superficia di a curnea da rittificanni l’arcu, è mudifichendu l’angulu di rifrazzioni di a luci chì caghjuneghja danni di a vista.

  • Ind’è u Miopu, spiana l’arcu di a curnea trattendu a parti di mezu
  • Ind’è l’Ipermitropu, si faci in pirifiria da imbuffà a parti di mezu
  • Ind’è l’Astigmatu, caccia l’irrigularità di l’arcu
  • Ind’è u Presbitu (Ipermitropu), fà in parti a currizziò di l’arcu da migliurà a vista da vicinu

  
  

  L’epiteliu cavatu torra à fassi pochi ghjorni dopu da sottu à u lentu fasciatura.

  S’edda pò caghjunà calchì dulori à u principiu di a budditura (1 o 2 ghjorni), quidda tecnica di trattamentu cù u laser hè più cà sicura postu chì, a curnea sempri intreva, appuculisci i risichi mentri l’uparazioni è certi effetti pocu piacevuli (arsatura di l’ochju, calata di i cuntrasti…) è ferma a megliu manera pà i pazienti chì a curnea saria fina troppu.

• Tappi di u trattamentu

  L’intarvinzioni si faci in ambulatoriu, à u Centru Laser EYETECH. S’eddi sò cuncirnati tramindui l’ochji, di regula sò trattati à tempu.

  Tappi 1

  Dopu à un’Anestesia Topica di a curnea (cù i gocciuli), è l’aiutu di un Blefarostat, u Duttori richjina nant’à una superficia pricisa, a mani a più à gallu – l’Epiteliu – spessu da 0,05 à 0,06 mm. Sta tappa, altr’è tantu u restu, hè senza dulori.

  Tappi 2

  Dopu u Laser EXCIMER (sottu à u cuntrollu di un EYE TRACKER di prima trinca, chì teni u centru di manera cumpiita), scalpiddineghja, in modu sicuru, a curnea cù culpetti lebbii lebbii è cuntinui, da rittificanni l’arcu è areca, in pocu tempu, a currizziò di a vista bramata.

  Tappi 3

  Si compii l’intarvinzioni cù l’Epiteliu chì si riforma in modu naturali da sottu à u lentu fasciatura. U tempu di a budditura pò frasturnà una stonda (frastorni adulcati da certi midicini antalgichi è gocciuli da lubrificà). Una mascara rifritatoghja hè rigalata ad ogni pazienti.

• Dopu à l’intarvinzioni

  A stonda di ricuperu si pò dà ch’edda frighji à certi – cù dulori più o menu acuti sicondu i casi, è cù una vista tribbulata (chì a dura certi volti fin’à 3 ghjorni, cù una cima à u capu à 2 ghjorni in leia cù a riginerazioni cintrali) .

  Ùn ci hè da spavintassi tandu, hè segnu bonu ! Volisi dì chì u centru di a curnea hè in traccia di boddasi. Casu mai fussi sopr’à pinseri u pazienti, pudarà chjamà u duttori cù u so teleffunu parsunali ad ogni ora.

• U seguitu

  À tempu à a visita di u 3u ghjornu, u duttori cava i lenti di prutezzioni. L’acutezza di a vista scambia sicondu a parsona : da 3 è 4 diceni pà un miopu, chì cunveni da vicinu è pessima da luntanu pà un ipermetropu. Ma nienti di strasurdinariu : a sinzazioni di velu lebbiu hà da smariscia à pocu à pocu francatu dui o trè sittimani.

  Si pò turrà à travaglià à l’usu d’innanzi à capu à u 4u o 5u ghjornu. U « maquillage » pò essa apradatu à u capu à deci ghjorni, è u sport à capu à quindici ghjorni.

  Un trattamentu cù gocciuli si faci mentri i 4 mesi chì suvitani. Hè megliu à metta spichjetti neri di soli fora, casu mai fussi putenti troppa a luci o puri mentri i dui primi mesi dopu à l’uparazioni..

  A vista si migliurarà in modu cuntinuu cù i primi sittimani, pà stabilisciasi à capu à u sicondu mesi.
  Dopu, ogni annu un cuntrollu hè cunsigliatu più cà più.

• Costu di u trattamentu

  A chirurgia rifrattiva ùn veni rimbursata da a Sicurezza Suciali.

  U costu hè di regula di 1.600 euro ad ogni ochju è 3.000 euro per i dui ochji (chì una parti hè presa in carica da part’è più di a mutuali).

  Un costu pricisu vi sarà datu, à tempu à un contu d’unurarii.
  Ùn timiti di chera infurmazioni in sopr’à più à u nosciu sicritariatu.

  Dui asamini capu nanzi (presa in contu, in parti, da a Sicurezza Suciali) sò à priveda:

  • Una Tupugraffia di a Curnea (150 euro) cù Aberrumetria + Pachimetria chì parmetti à tempu l’uparazioni è di parsunificalla (intarvinzioni sopr’à misura)
  • Un asaminu nanzi à l’uparazioni (110 euro) cù
    • Un fondu di l’ochju sanu (Retinufuttugraffia + V3M)
    • Rifrazzioni in sopr’à più sottu à Ciclupegicu